後日踏入52歲嘅郭富城（Aaron）於9月榮升老竇，30歲大陸老婆方媛（Moka）喺香港生女，小公主話咁快已經個幾月大，已為人父嘅城城依然有魅力，今日以代言人身份到尖沙嘴出席LONGINES揭幕禮，連對面馬路嘅途人都被吸引，唔理安危走出馬路影相，令附近交通有啲擠塞。
大會送上一對情侶腕錶，錶背面刻有城城一家三口成員英文名嘅首個字母「AMC」，仲送咗一隻搖搖馬畀小公主，春風得意嘅城城宣布囡囡英文名：「中文名未改，英文名係自己好鍾意一個C字頭嘅，Chant，有希望嘅意思，同太太一齊改。」
後日城城52歲牛一，問到今年生日係咪特別開心？城城甜笑：「應該都係。」上年願望係咪實現晒？佢再笑：「其實願望要不斷創造，呢一刻家庭好圓滿，所以工作上希望更加多突破，因為做爹哋之後唔同咗，希望事業上有更多火花。」城城仲話今年生日會留港同屋企人慶祝：「咁啱嗰日唔使開工，自己一定返屋企，同家人食飯切蛋糕，影吓家庭照，簡單已經好開心。」城城同老婆Moka一齊幫囡囡改嘅英文名Chant，字面上可解作「誦唱」，Chant普遍會用於男孩子，有着「受歡迎」的意思。
(蘋果日報)
