藝人王祖藍和李亞男夫婦在沙田九肚山新樓盤「尚珩 La Cresta」拍住拖參觀豪宅。訪問時，祖藍更直指「啱心水」：「老婆佢有咁多私己錢，要諗吓點用喇！」
亞男聞此即笑指老公食軟飯：「啲飯仲要係我煮埋！」問到心水盤的條件，祖藍即謂：「如果萬一要生BB，外父外母都會過嚟湊，或者用作投資，但呢啲都係睇老婆頭。」又指屋企最緊要是方便到內地，最好就一出車便上大路不用塞車。
問幾時至會生B，祖藍即指明年會開始努力：「依家都好忙，工作排到年中，依家傾緊年尾嘅。（做嘢要停一停？）有咗先算啦！依家盡量係排兵布陣，令自己唔喺度都可以做嘢暢順。」
提到最近有指亞男曾患抑鬱症，亞男即澄清從未患病：「啱啱結婚時老公就去咗橫店拍三個月嘢，嗰時係有啲唔開心，英文係叫有啲Depressed，但都係嗰時啫。」祖藍聞此即為老婆補充：「係翻譯問題，活躍就唔係有活躍症，有啲Depressed就唔係有Depression，可能我有啲鬼仔性格啦！」他們又笑指最近有不少少聯絡的朋友會主動關心亞男，不但有人向她推薦工作解悶，更有人送藥，亞男向祖藍笑謂：「真係多得你唔少！」
講到祖藍有意捧亞男做女廚神，祖藍即大爆老婆開工前為公司同事煮定愛心飯盒：「佢擺落個酒店袋好似外賣咁！下年仲會出廚藝書！」亞男就透露書中會透露她在廚藝上的成長經歷：「以前會煲燶嘢，仲會用雞精煲湯，依家就進步咗好多。」祖藍更指對方有諗過到法國學「藍帶」廚藝：「但佢唔敢去，費事去到嗰邊幾個月又再Depressed，學『藍帶』學到個人Blue晒。」
(on.cc東網)
