【你唔X問我點入行?】杜汶澤開名鬧爆:睬你都生臭狐

向來敢言嘅杜汶澤,忙於宣傳新片《空手道》,今日佢忽然喺fb留言炮轟商台,言談間透露係因為訪問內容而不滿,佢話:「其實你又點會估到,到今時今日,仲會有電台主持人問你,究竟你同劉德華吳君如唔啱,係咪真㗎?我真係啋|(睬)你都生臭狐啦!咁懷舊,你唔X問我點入行?吖佢個樣仲要好驚訝咁,好似一世都未諗過我會唔答佢咁喎,你估我杜汶澤今日有戲要上,就咩都要答你喇咩?依家咩年代呀?莫講話你個台家陣少人聽吖,多人聽我都未驚你呢!商業電台!」

 

之後阿澤仲hashtag話:「#錄咗唔播正契弟#雖然你本身都係」不過阿澤未有透露究竟係接受邊個節目同邊個主持嘅訪問,不過開名講明喺商業電台,有網民就估計係節目《1圈圈》。查實當時阿澤同劉德華傳不如嘅時候,佢嘅恩師吳君如亦因為阿澤成日寸寸貢兼衰多口,兼且仲得罪埋君如心目中嘅男神劉德華,結果君如忍唔住要unfriend阿澤,阿澤喺華仔嘅演唱會做嘉賓,已經澄清咗呢件事,君如同佢又做返朋友,仲成日互撐對方喎!

(蘋果日報)