【8歲大仔有要求】陳慧琳:講明唔會再…

    陳慧琳(Kelly)今晚出席中環IFC舉行嘅Valentino早春系列開幕酒會,一見記者就狂呻自己懶咗又肥咗,所以要狂做運動:「嚟緊要去日本拍MV,日本好凍,又要拍街景,外景嘅時候又要着大褸,要着4重衣服,所以要令自己瘦啲。自己好耐都冇出歌啦。」

    兩個囝囝會唔會跟埋一齊去?Kelly話:「兩個小朋友要返學,同埋我自己唔得,做嘢嘅時候唔可以帶埋佢兩個去,我未同佢哋講,不過我今次走4至5日啫。」問出門嗰陣,兩個仔會唔會唔捨得攬住佢喊?Kelly話:「唔會啦,佢兩兄弟有得玩就得,唔會理我咁多。」嚟緊萬聖節,佢會扮番上年木乃伊造型,又預備咗啲糖果俾小朋友,不過佢話8歲大仔講明唔會再扮,Kelly笑言:「佢覺得再扮萬聖節嗰啲就好傻,o依家唔要得意,要cool,有陣時髮型都好有要求。」

    SHARE