【張智霖買近億豪宅冇落老婆名】靚靚甜笑:唔會放過老公

袁詠儀(靚靚)、廖啟智、劉偉強、馬榮成、宣萱等,今晚喺九龍塘浸會大學出席「第14屆全球華語大學生影視獎頒獎禮」。

廣告

靚靚被問到佢老公張智霖(Chilam)榮升業主,買入大坑區近億豪宅,佢直認:「係呀,今次係老公首次置業。」

廣告

問到點解老婆冇名?靚靚重申Chilam有問過佢意見:「老公有問過,係咪寫我名,但我就覺得佢o依家儲到錢,可以買樓係一個好嘅心態,佢作為一家之主好重要,我哋買樓自住,好多人叫佢投資,我覺得置業先好,當然用佢個名。」靚靚笑話嚟緊唔會放過老公,但搵到自己嘅心儀單位先再講。

提到層樓買入價9,180萬,咁係咪代表張氏夫婦豪到近億嘅先買呢?靚靚就話唔係只睇錢:「要睇鍾唔鍾意,我都有睇過億嘅,但冇心動,最重要睇環境,未必一定入去住,或者放租。如果自己長住要諗裝修,可能要諗幾年,o依家能力做到買嚟自住。」鍾意啲咩裝修?靚靚話鍾意啲簡單嘅,不過有咗小朋友,好難有型,靚靚笑話:「屋企充滿Lego、公仔、單車、滑板,冇型好耐,最重要有家嘅感覺。」

(蘋果日報)