#洪朝豐：人總有一死，我已經贏咗好多嘅愛。。。
57歲患有抑鬱狂躁症多年嘅前DJ洪朝豐，早前確診患上脷癌。
洪朝豐同仙樂都今日出席《情謎梵高》嘅首映，問到佢嘅病情點，佢就話：「按西醫安排呢，一個星期就要做手術，但我睇緊中醫，食咗藥就冇咁痛，聽日就去南京三個星期，接受一個中醫團隊醫病，到時會有4個中醫。」
不過今次去三個星期，洪朝豐就會錯過咗西醫建議嘅最佳做手術時間，但佢就話冇所謂：「因為任何一個醫學決定都係一個賭博，我都願賭服輸嘅，我都帶住樂觀嘅諗法。如果切除嘅話，會切三成至一半，如果舌頭下面有癌細胞，就要切開個下巴去做，手術嘅殺傷性都好大，我覺得中醫溫和啲。」洪朝豐話自己有一個唔怕死嘅性格，佢話：「人總有一死，我已經贏咗好多嘅愛，我會笑住死，都輸得起。」仲指冇乜後事，只係講咗間屋會畀個仔。講到醫藥費嘅問題，洪朝豐就話自己有積蓄，佢話：「都係有限，朋友都有同我講唔使擔心，有需要會資助我。我問過朋友，都係一千蚊人民幣一日。」
(蘋果日報)
