【洗米華抱B女錫Mandy上封面】洗米嫂37歲生日「大禮」…

今日太陽娛樂公司老闆周焯華(洗米華)同Mandy Lieu成為封面人物——故事聲稱在英國一間攝影公司網站搵到Mandy Lieu抱住初生嬰兒,與洗米華嘅一家三口照片。相片有兩輯,一輯應是Mandy仍在醫院,戴著手帶、化晒妝抱B與洗米華合照;另一款係黑白圖,包括Mandy錫洗米華、洗米華鍚Mandy額前,同埋兩人齊齊錫BB,乜嘢組合都有齊晒。

報道稱,Mandy今年九月為男方誕下第三胎,呢胎係女嚟嘅,換言之,兩人一齊短短四年,Mandy已為洗米華誕下兩女一子,四年抱三。喺洗米華咁舟車勞頓、香港澳門倫敦周圍飛交人仲要處理公司業務之際,仲可以「交到貨」生三個,確係有辦法。報道更指,洗米華要求Mandy 一家四口齊齊搬返澳門,方便照顧。報道引述消息人士稱,Mandy話好。

去年11月2日,洗米嫂陳慧玲喺ig貼圖,係一張生日蛋糕相,同自己講happy birthday(洗米嫂係11月1號生日)。今年,37歲嘅洗米嫂,又收到另一份生日禮物——就係呢個封面故事。究竟係校啱時間定係巧合?其實類似巧合,兩年前都發生過,當時洗米嫂刻意安排在洗米華生日(5月30日)開刀誕華種,點知身形唔似大肚的Mandy竟然10日、即5月20日(國語諧音「我愛你」)為洗米華誕女,又上封面。

再之前,當洗米嫂喺社交網晒完陀巨肚着比堅尼曬太陽嘅相之後,Mandy又喺Instagram放了一幅紅色露背泳衣相證明陀「華種」,進擊的Mandy更以英文留言:「親愛的,你都做唔到好似我咁樣,所以唔使搞咁多嘢喇,只會顯得你好可悲。」

依家Mandy Lieu又「送」咗呢份「大禮」,未知洗米華又會如何拆彈喇。睇番往績,前年洗米嫂生日,洗米華成家喺澳門為Heidi慶祝生日,仲送咗隻貓俾佢,又送上花語係「永恆之美和美麗」嘅繡球花俾太太。唔知今年會送乜嘢呢?

(蘋果日報)