【已經12年】鍾麗淇無悔兼唔留戀:好過我嘅人大有人在

    鍾麗淇離開無綫轉戰瑜伽界,至今已執教長達12年!當初獲伯樂黃佩霞游說接觸高溫瑜伽,由一張白紙蛻變成專業導師,不諳廣東話的她鬧過不少笑話,本想要求學生「唔好頂住個肺」,卻說成「頂……個肺」。她表示無悔轉行,因瑜伽已融入生活,即使獲邀幕前演出也會Say no!

    初學面色發紫

    鍾麗淇(Margaret)於無綫默默耕耘9年,演出過17部作品,2005年卻毅然抽身轉投瑜伽界!一切只因機緣巧合,她說:「2002年去澳洲拍旅遊特輯,認識咗呢間瑜伽創辦人之一嘅黃佩霞,當時佢開始做高溫瑜伽,叫我試堂玩吓,第一堂好辛苦,90分鐘喺班房熱到塊面變紫色,要衝出房!」及後黃佩霞鼓勵她堅持,由起初給予折頭,到後來索性贊助她。

    Margaret初學時筋骨未夠柔軟,很多動作也未能完成,為免被同學們望到,她每次也選擇最後排位置,過了一段時間才接受自己的不完美,她說:「倒不如努力啲,後來我跟咗其中一位老師,每日四點上堂,嗰時去非洲拍劇會拎DVD嚟睇住做,對瑜伽好有熱情。」

    教到失控爆喊

    Margaret成為正式導師前,接受了連串訓練,於外地完成五星期課程返港後,卻向黃佩霞推卻執教:「課程中教好多瑜伽歷史同道理,我先發現原來乜都唔識,所以唔想教,但佢對我有信心,叫我做住助教先,點知冇耐就掟我出海做導師,記得教第一堂時,入班房唔知點開聲講嘢,好緊張,到落堂先鬆一口氣。」如是者展開一星期教18堂瑜伽生涯,但教了兩個月後,有一日Margaret於導師房失控爆喊,全因課堂中的一個動作,大部分學生未能擺出正確姿勢,她將責任怪在自己身上,認為教得不好所致,在旁的導師聞言即大呼做得好:「佢話有時一堂成90個學生,冇可能每個都滿足到,只要佢哋安全就得,唔好對自己要求太高。」

    從藝員轉變為瑜伽導師,Margaret直言感覺得意,但試過有學生問她參演的劇集,令她有點不開心:「惟有當係轉捩點,唔理得咁多,總之對自己有信心,打好個底就唔怕。但都有爆笑位,成日講錯廣東話,將膨脹個肋骨,講做排骨;想叫學生唔好頂住個肺,但講咗頂……個肺。」

    變心惟有二揀一

    談到當初為何捨得放棄水銀燈下生活,Margaret自嘆技不如人,未能一心二用,倒不如集中做好一件事,於二選一情況下,原來心中早已有答案:「個心變咗,好似拍劇收工就拎住瑜伽嘅碟去睇,咁既然有機會轉行點解唔試吓,嗰段時間可以負擔到,所以呢步唔難踏出去,因為冇嘢放唔低,係心態問題,已忘記自己係藝人。」放下了演員身份,令Margaret感到前所未有的舒服,加上瑜伽學校大多數導師是外國人,不知她曾當演員,連學校的外籍老闆由黃佩霞口中獲悉她曾於無綫工作,也誤會她是新聞主播,Margaret對此高興不已:「100%做自己,唔驚講錯嘢,又可以講英文交流瑜伽!」

    一教便是12年,現時瑜伽對Margaret而言是生活的一部分,在家也會教兩個女兒做瑜伽,她表示已不再留戀娛樂圈:「好過我嘅人大有人在,接咗劇要專心,我寧願選擇唔接,除非有意義啦!我覺得冇揀錯瑜伽呢條路。」

    鍾麗淇 Profile
    英文名:Margaret
    出生日期:1976年11月3日

    入行經過:1995年參加多倫多華裔小姐可惜落選,及後報讀無綫藝員訓練班,畢業後加入無綫大家庭,演出過的劇集作品包括《刑事偵緝檔案III》、《衝上雲霄》、《鑑證實錄I、II》及《天涯俠醫》,最後一套作品為《心慌.心郁.逐個捉》。她由2005年起擔任瑜伽導師,至今已教了12年。

    (東方日報)

    SHARE