每年嘅生日你會點樣過呢？
11月生日嘅藝人朋友特別多，好似今年行緊晚年運(唔識睇相都知啦)嘅「鼎爺」李家鼎，一個煮餸節目《阿爺煮房》令佢人氣急升，拍電視、廣告，連私房菜都撈埋，好多時都分身不下。剛度過72歲生日(11月1日)嘅鼎爺真係忙到連慶祝自己生日嘅時間都冇，噚日阿仔李泳豪就專登去咗老豆間私房菜同佢講聲生日快樂，留言﹕「老豆生日週開始。」見鼎爺着住件大廚衫，應該都係幫客人煮緊嘢食，抽少少空檔見吓個仔，拎住盤壽包同阿仔影相時，都笑到四萬咁口！
而前日41歲生日嘅鍾麗淇，就有一大班朋友幫佢搞咗個生日派對，「七魔女」嘅佘詩曼、文頌嫻、周家蔚、梁靖琪都有出席，鍾麗淇喺ig以英文留言﹕「我同家人及最親密嘅朋友歡聚咗一個生日嘅週末，感謝你們讓我感到被愛。我很感恩和感激你們所做嘅一切，我希望將笑容同擁抱送俾你們！」
「煒哥」陳煒嚟緊11月23日就43歲生日，佢就同陳法蓉、岑麗香、設計師何國鉦等開咗個預祝生日會，陳法蓉喺微博送上祝福﹕「預祝親愛的煒哥生日快樂！心想事成，謝謝準壽星妹陳煒 和屋主親手煮的美味大餐。」
(蘋果日報)
