【瘦到得返90磅】石天欣回港十日 驚現刀削尖面


石天欣去年7月下嫁任職市場營銷嘅男友Jacob,婚後要喺美國一年坐「移民監」。

上月底,天欣終於返嚟香港喇,除咗要去警署銷案,當然亦要見吓屋企人同朋友,佢仲話好掛住香港嘅美食添。

天欣同媽咪去咗食地道車仔麵,天欣梳咗齊蔭頭,加埋長到近腰嘅頭髮,望落瘦咗好多,結婚時嘅幸福包包面不見了,成塊面尖晒。

不過,天欣就好好胃口,同媽咪一人一碗車仔麵,同媽咪互夾對方啲餸,感情似乎好好。

有媒體致電天欣,原來佢噚日就起程離開香港返美國,佢話:「眨吓眼就冇咗10日,新年會再返嚟香港。今次最開心係見到媽咪同朋友,因為屋企最近裝修,所以要幫屋企執屋。」

問到點解瘦咗咁多?天欣話:「我90幾磅,好多朋友都話我瘦咗,其實係肌肉,修咗啲線條,firm咗啫。」

(on.cc 東網)