現年35歲嘅樂壇HipHop組合農夫成員之一嘅陸永，喺圈中出咗名係愛妻之人，兩個囡囡Hannah同Simsim分別5歲同4歲，非常可愛，而身為爸爸嘅陸永就緊係當兩個寶貝女如珠如寶，非常珍惜一家人相處時光嘅陸永都周不時上載同兩個囡囡嘅溫馨時光上社交網站同大家分享。
而陸永嘅大女Hannah仲出晒名係超級電視迷，陸永同老婆Rainah不時po囡囡啲鬼馬片出嚟，之前佢睇《殭》嗰陣，就好迷戀演刑活著嘅鄭嘉穎，囡囡Hannah喺片中，話要打畀刑活著，陸永即時打畀佢，當時囡囡Hannah不知幾投入，而早前睇大台劇《城寨英雄》，講到演花曼嘅王君馨被殺手組織嘅人用刀插死，令囡囡Hannah好心痛，陸永老婆Rainah喺Instagram貼咗條片，見Hannah喊得好犀利，大大滴眼淚，由爸爸陸永抱住，原來係因為花曼姐姐死咗，事後王君馨有喺Instagram拍咗條片回覆：「君馨姐姐只係拍緊戲，你都知道，所以唔好咁傷心，我冇事，多謝你嘅支持。」
(蘋果日報)
