張智霖囝囝張慕童（魔童）日前生日，媽媽袁詠儀就PO咗一張一家三口大被同眠嘅溫馨合照，網民都話成張相都充滿愛。
點知去到夜晚，Chilam竟然PO咗張被咬傷，大髀瘀咗一大撻嘅受傷照，仲留言話遭「家暴」。
Chilam個傷口有一排密密嘅牙齒印，睇真啲，原來係佢屋企隻狗狗造成。
推斷係玩嘅時候，狗狗一時唔小心咬傷Chilam，唔少網民見到男神受傷都大嗌心痛，仲提醒Chilam要記得打瘋狗針，不過就有網民認為屋企養嘅寵物都打咗防疫針，只要盡快清理傷口就可以。
另外，有網民就錯哂重點，笑作為男神嘅Chilam有濃密嘅鬍鬚Man到爆，但係大髀竟然冇乜毛，濃密鬚根同光管腳形成強烈對比好搞笑。
（on.cc 東網）
