袁文傑今日喺荔枝角出席活動，佢今年因劇集《不懂撒嬌的女人》角色游先生跑出大受歡迎，無綫睇準機會，袁文傑話今月同公司嘅經理人合約正式生效， 袁文傑話薪酬方面有直接提升，稍後會拍一個健康飲食節目，同陳煒、馮盈盈、朱智賢等靚女合作，袁文傑話女朋友張潔蓮對佢放心同信任，唔會呷醋。
袁文傑主力向演藝方面發展，司儀工作亦都會做，佢話雖然之前喺友台都有呢個機會，但o依家要重新被人認識。突然變咗大忙人結婚日子或會變，袁文傑話：「女友唔會擔心，佢生活好充實，o依家可以教小朋友，啲家長都好錫佢，我就建議佢可以自己搞生意。」袁文傑承認今年收入比過往大有進賬，會儲埋啲錢結婚，心願係想同女友去好多唔同地方旅遊見識，有計劃去北歐、冰島等地方，會唔會求婚？袁文傑話：「我個人覺得低調型啲，如果要話畀大家聽都係朋友要求，真係結婚會話畀大家聽，有諗過搞個搖滾音樂會求婚，唔駛大型，最緊要型。」
