藝人陳國峰到電台受訪，並帶同兩個月大的囝囝「峰之子」到場，十分可愛。受訪時他表示今日上來分享做新手爸爸的經驗、湊小朋友的心得，亦傾吓安排囝囝的將來，講到咁快就要諗小朋友的將來？他笑言：「都係畀人薰陶，啲學位係幾萬人爭幾千個，所以都係時候諗定，太太依家出去同人傾偈都有傾吓呢方面。」問到可會覺得自己及太太會是怪獸家長？他說：「我諗冇一個家長唔係怪獸，因為驚小朋友食唔好、瞓得唔舒服，但如果太嚴重都唔好，至於我會唔會安排小朋友參加好多課外活動，我唔會逼佢學啲佢唔想學嘅嘢。」
唔敢同仔仔沖涼
他亦表示現時已習慣湊B，並笑言辛苦過拍通宵劇：「因為半夜要起身餵奶，不過都習慣晒，我依家都好醒瞓，佢小小動作我都會起身，好緊張。（餵奶、換片熟手未？）餵奶、換片、掃風非常專業，反而沖涼唔掂，咁耐淨係幫佢沖過一次涼，主要都係我太太同外母幫佢沖，可能等佢大個啲，我哋一齊沖。」
戒「鹽」可以健康啲
另外，講到TVB發內部指引，不鼓勵女藝員拍劇賣弄性感、強姦及床上戲情節亦以意會形式帶過，對此他表示不知道此事，但笑言戒「鹽」可以健康啲，問到可覺得TVB劇集愈來愈多大膽性感畫面？他想了一會兒，說：「都好似係，以前《天地豪情》都好似唔會拍到好detail。」問到可覺指引是好事？他表示：「都唔係壞事，畫面上對觀眾始終有影響，睇嘅時候可能都有個幻想喺度，所以係好啲，我個仔依家都開始睇電視，所以冇咗呢啲畫面都好嘅。」
(東方日報)
