內地近期推出咗唔少嘅真人騷，除咗一班爸爸帶住自己嘅小朋友出去玩嘅《爸爸去哪兒》之外，仲有《不可思議的媽媽》，呢兩個節目都引起唔少嘅熱話。不過講到同小朋友一齊拍真人騷，不得不提一班星級爺爺帶住一班小朋友出遊嘅《寶貝的新朋友》。
佢哋同一班小朋友去旅行體驗生活，當中最引人注目嘅爺爺，莫過於謝賢。
事關謝賢氹小朋友，可以話係高手中嘅高手，唔少網民都話謝賢對小朋友完全盡顯鐵漢柔情嘅一面。
《寶貝的新朋友》嘅節目組就剪咗一段謝賢嘅特輯，當中就有一段佢同小朋友一齊玩遊戲。謝賢就同個小朋友面貼面運乒乓波，開始嘅時候，佢已經講明淨係玩一兩次，不過見到個小朋友咁開心，就算自己腰痛腳震，都一樣繼續玩，為嘅就係想幫個小朋友贏。
而個小朋友亦都相當識做，玩完遊戲之後即時錫咗謝賢一啖，氹到謝賢笑到見牙唔見眼。
雖然謝賢平時相當嚴肅，不過面對小朋友扭計，佢不但冇表現出不滿，而且仲相當有耐性咁氹佢，一手抱起個小朋友氹佢瞓覺之餘，仲拎紙巾幫佢抹汗，認真唔話得呀！
難怪謝賢笑言自己對照顧小朋友其實有一手，唔少網民都話謝賢對住小朋友相當有耐性，仲話佢好識同小朋友相處，大讚佢其實係一個親和力十足嘅爺爺。
(on.cc 東網)
