萬事起頭難，30歲先轉行做地產經紀嘅寧進，坦言最初好唔慣，更試過想劈炮唔撈。「開頭真係好唔慣，以前都算係藝人一個，出入有人招呼服侍，初初做地產，要企喺條街搵客，新盤開，又要同其他agent搶客，雖然有底薪，但比起我之前開泳池公司、酒吧生意，始終都爭一大截。」
好似採訪當日，遇正橫風橫雨，着住西裝嘅寧進，帶住睇樓嘅客人，逐家逐戶去睇樓，又要熟讀每一個屋苑嘅資料數據，先可以即時回答客人問題，以一個新丁嚟講，絕對唔易。
4年前娶咗初戀情人、舊年生咗囡囡嘅寧進，曾經喺自己手上賣過逾兩億豪宅，寧進坦言現時有唔少聲稱係專家嘅人，分析樓市動向，由08年金融海嘯到o依家將近10年，樓市幾乎只升不跌，即使政府加辣再加辣，各區樓價不跌之餘仲每每破頂。而每日都要接觸地產物業嘅寧進，對樓市又有佢另一個睇法。
「啲人成日話個市就冧，呢句說話我都聽咗好多年，亦害咗唔少人，啲所謂專家，又話嚟緊會加息，又話政府有辣招，老實講，呢啲報道害咗好多人，因為以我經驗，就算跌市，都肯定追唔番升嗰一浪嘅升幅，嗰時唔上車，追唔番，中途落咗車，又係追唔番。我哋地產佬成日都講，唔怕入錯市，最怕你唔敢入。」
(東方日報)
