70年代時家計會為咗勸籲市民節育，就推出咗口號「一個嬌、兩個妙、三個吃不消、四個斷擔挑」，不過今時唔同往日，時勢逆轉鼓勵大家生育，而藝人林盛斌（Bob）同老婆Pearl就生咗4個，最大嘅囡囡林霏兒（Faye）依家9歲，最細嘅囝囝今年8月出世，要養大4個仔女真係長路漫漫！
而呢日Bob嫂就喺Instagram上載咗張相，原來佢去咗瘋狂掃貨，啲戰利品真係多到嚇死人呀！
適逢尋日有超級市場展開為期5日嘅大減價，Bob嫂就趁機大開殺戒，佢留言：「今日（尋日）對於各位靚太實在係全城盛事嘅開始！一早我已經去左（咗）放血，返嚟send左（咗）呢張相俾（畀）林生，勉勵佢努力工作，鬼叫你生左（咗）四件，仲一屋都係人！佢話：去買野（嘢）買到咁 會唔會有啲離地？😅😅」
相中見到Bob嫂真係買咗超級多嘢食，除咗一大堆乾糧，仲有數都數唔晒嘅雪藏食品，閒閒哋都32塊扒、調味料都過10枝，鋪到一地都係，究竟阿Bob屋企有幾大、有幾多個雪櫃呢？
其實除咗4個細路，屋企仲有家傭姐姐，網民都笑言：「可能2個星期就食哂（晒）！」Bob嫂仲上載咗同老公WhatsApp對話，佢話：「你要努力工作，四個斷擔挑。」
相信阿Bob咁搵得錢，唔會斷擔挑嘅！
(on.cc東網)
