【顧家顧老婆】幫大仔物色好學校 陳豪:小學係斷定人生

陳豪、陳貝兒同甄澤權今日喺將軍澳出席「魔幻廚房揭幕禮」,陳豪透露最近忙緊籌備大仔12月嘅生日同聖誕Party,佢仲話上年嘅聖誕節,太太陳茵媺負責煮火雞。

下月4日係大仔Aiden嘅4歲生日,陳豪表示會籌備一個以Super Hero為主題嘅生日party,問佢會唔會扮Hero?佢話:「我未諗,0依家搞場地先、安排食物、娛樂環節,好多嘢都要安排,但係太太好叻,係party能手,帶到驚喜,所以交畀太太搞,保證開心。」

12月適逢係大仔生日同聖誕節,但陳豪話唔會買太多禮物:「上年嘅禮物都未拆晒,我會收起部份,太多禮物會令小朋友分心,所以會捐去慈善機構。」

陳豪又指現時忙緊為大仔搵小學,報咗幾多間學校?佢笑住話:「唔話你知,其實小學係斷定人生,所以要物色一間好嘅學校,面試多,對小朋友係一個好好嘅訓練,自信心都會多啲,會選擇國際學校。」

講到陳豪日前喺Ig上載同太太二人世界嘅相,佢話:「必定,就算有咗小朋友,父母都要安排時間俾自己,俾晒小朋友係唔健康,兩個人嘅愛要延續,唔好冷卻。」所以食飯都要拖手?佢笑笑口咁話:「好小事啫,仲有個trip都未去。」

(蘋果日報)