【恭喜恭喜!大美人亨亨結婚九周年】東京拖實影相好恩愛

大美人李嘉欣前幾日喺微博貼番佢同老公許晉亨喺08年結婚相,慶祝9周年結婚紀念,除咗重溫舊照,兩公婆原來喺結婚紀念日去咗東京過二人世界,日前有讀者郭先生發現李嘉欣同許晉亨喺明治神宮外苑睇銀杏葉,但就唔見佢哋囝囝Jayden。

當時大概中午12點,嘉欣着住件橙紅色大褸戴住黑超,亨亨就羽絨背心西褲打扮喺公園出現,相片入面見到嘉欣捧住一大堆銀杏葉,而亨亨就用手機幫老婆影靚相,之後輪到嘉欣拎自己部手機同老公selfie。讀者郭先生話佢哋兩公婆全程都好恩愛:「見到佢哋好恩愛,好甜蜜,由公園尾尾行到街頭,老公拖住老婆,去到中段許晉亨執地下銀杏葉畀李嘉欣揸喺手影相,見佢哋影得好開心。」睇返條片,嘉欣就已經拎住堆銀杏葉擺緊甫士,揸機嘅亨亨就好細心,要老婆行前行後、行右幾步避吓陽光,影完幾張,又再幫嘉欣整理兩邊頭髮再影過,一啲都唔hea,而嘉欣被老公影相,都份外笑得甜。

Apple Daily