鄭中基(Ronald)、方皓文，仲有Supper Moment噚晚係灣仔會展出席環保音樂會，眼見Ronald發福咗唔少，佢話：「因為準備拍戲，係要增磅，o依家增咗幾十磅，有飲奶粉，飲到個人好燥，生哂暗瘡，過完農曆年就要開拍。」Ronald有兩個仔女，唔知會唔會生第三個，佢話：「唔使，仔女大，o依家要陪仔女讀書，太太話鍾意讀書都唔係咁樣讀，我教佢哋數學，背生字，默書，o依家啲生字都幾難，對佢對我都覺得係深，o依家都唔使補習，再深我都要進修，讀佢哋隔離班。」
做咗日籍人妻嘅方皓玟就話聖誔節會返日本，問佢係咪見老爺奶奶，佢話：「都會見吓面，主要去旅行散心充電，因為過去一年都忙住工作。加上公司同事個個都請假去旅行，唔係剩低我一個唔去嘛？」咁會唔會順便造人？佢話：「暫時唔諗住，呢啲係天送嘅禮物亦唔會抗拒嘅，等佢自然咁發生。隨緣喇，順應自然係偉大法則嚟。」三缺一嘅Supper Moment，原來成員CK做咗老竇喺醫院陪太太，SM話：「佢之前都話老婆呢幾日生得。佢只係話個BB好多頭髮咋。」咁佢哋送咩禮物呢？「我哋會送份合約畀佢個仔，簽咗佢先。會爭住做契爺！我哋三個變福祿壽，不過都未去醫院探BB，但聽CK把聲係好興奮，其實佢當日公布老婆有咗，嗰時佢個笑容係以前從未見過，係真係好開心嘅，咁佢本身好鍾意小朋友嘅。」
(蘋果日報)
