藝人陳浩民同太太蔣麗莎育有4個仔女，一家六口可謂幸福滿瀉。近期蔣麗莎就帶同大女Elizabeth、二仔Cyrus及三女Isabella齊齊出演內地真人騷《不可思議的媽媽》，唔少網友睇完之後都話為人母親甚艱難，上節目湊住三個都咁辛苦，更何況四個？
呢日蔣麗莎就喺社交網站上載多張同一班仔女齊齊為迎接聖誕節做準備嘅相，雖然距離聖誕節仲有一段日子，不過四個小朋友已經急不及待着起聖誕服飾，實行提早慶祝聖誕節呀！不過要佢哋四個坐定定咁一齊影相真係話都冇咁易，Elizabeth同Isabella乖乖哋望鏡頭嘅時候，Cyrus同細妹Victoria又不停搞怪。到Elizabeth同Victoria望鏡頭，另外兩個又掛住玩，難怪蔣麗莎會留言話佢哋係四大天王：「四大天王很強哦～本想拍個美美的相片，結果……又以喜劇效果而結束，你們感受到了四大金剛的威力了吧！」
(東方日報)
