噚日係夏韶聲嘅65歲生日，不過佢噚晚仲有出席喺有九展舉行嘅頒獎禮，兼且仲獲頒發「殿堂搖滾成就大獎」，大會安排囡囡同孫仔現身台上，在「陳仔」陳柏宇陪同下切蛋糕慶祝。
夏爺受訪時笑言個囡同孫仔出現時佢都被嚇一跳：「噚(前)日同個女同孫仔食飯，無其他特別慶祝喇。」又笑言自己今年只係32歲，問到有乜嘢生日願望？佢話：「好想買返架電單車，以前都有揸，不過就唔喺香港希望喺美國，希望買架哈利或三輪車可以載兩個孫周圍去。」
喺14年結束第4段婚姻嘅夏韶聲，唔知有冇諗過再娶老婆，佢笑謂28至32歲識煲湯可以應徵：「講笑啫，唔會啦，o依家單身咪幾好，我個腦冇諗呢啲嘢好幾年㗎啦，身邊有咁多人幫，事業緊要。」睇番夏韶聲嘅「婚姻史」，第一段婚姻係19歲時與圈外女友奉女成婚，二人育有兩女，婚姻維持10年；第二段婚姻呢，太太係美國人，婚齡只有短短3年。到第三段婚姻，87年與智利籍嘅BiBi結婚，03年傳因無綫前藝員梁詠琳介入，導致離婚。男方對BiBi存歉意，曾予女方6位數字過難關。至於梁詠琳，二人最終也因財失義反目。到第四段婚姻，夏韶聲05年喺溫哥華演出時結識越南華僑、富家千金Tina，認識4日閃電結婚，於2014年7月離婚。
夏韶聲坦言前妻離婚後火速再嫁，佢亦不甘示弱，自豪地說：「我大把女友，最緊要阿叔開心！」另外，獲頒「鑽石閃爍成就獎」嘅陳淑芬，接受訪問時話自己從事行業四十幾年今次係第一次攞獎當係一個鼓勵，同時亦係頒獎嘉賓，負責頒獎俾幾位歌手包括太極、夏韶聲 同盧巧音，陳太又透露嚟緊會同南京藝術學院合作，舉行課程希望培育音樂劇嘅新人。
03年，夏韶聲跟第三任老婆BiBi離婚，有傳是梁詠琳做第三者。 (資料圖片)
2014年，當時62歲嘅夏韶聲驚爆撇年輕15歲嘅有米老婆Tina，離婚原因竟是嫌前妻太愛他太黐身。 (資料圖片)
（APPLE DAILY）
