趙薇由一個有演戲天份嘅北京電影學院學生，到躋身大陸富豪榜，成為大陸四大花旦之一，當中可以話跌跌碰碰，趙薇讀大學二年級嗰陣，接拍電視劇《還珠格格》喺亞洲一炮而紅，其後拍《情深深雨濛濛》亦大受歡迎。
《還珠格格》左為趙薇
《情深深雨濛濛》右二為趙薇
不過同年佢因為喺曼哈頓為一本時裝雜誌影春夏相，身穿「旭日旗」設計圖案嘅連身裙，喺大陸形象插水，於長沙賀龍體育館舉行新年演唱會，更被人淋屎，即使2002年拍電影《天下無雙》、《少林足球》等電影喺港、台大受歡迎，之但係有佢份演出嘅戲一度喺大陸未能公映。
直至2007年，趙薇當時喺北京電影學院攻讀碩士學位，獲吳宇森導演邀請拍《赤壁》演吳國郡主孫尚香，喺大陸人氣先再度升，於2009年更以高票當選中國電影表演藝術學會副會長，之後拍電影《花木蘭》及《錦衣衛》，2012年首次執導電影《致我們終將逝去的青春》，2014年憑《親愛的》贏得香港電影金像獎影后。
《赤壁》劇照
曾有報道指趙薇與王菲老友鬼鬼，早年二人於香港炒樓，收入越賺越多，之後又喺上海及北京購入多間別墅或公寓，嫁俾富商黃有龍後，生下B女曾淡出娛圈，其後復出，亦有投資電影、買世界各地嘅酒莊、投資唔同嘅公司，曾斥資購入阿里巴巴影業股份，成為阿里影業第二大股東。
(蘋果日報)
