藝人翟凱泰（泰臣）貴為2018年元旦「好運1月1」賽馬日的「好運之星」，對新一年充滿希望，又自覺人生最好運就是成為演員：「可以做自己想做嘅嘢已經好好運，入行之後又會諗呢行會唔會好難搵食呢？冇人關照嘅話點算？又好好彩入咗劇團，離開劇團又搵到經理人接觸電視圈。」生活上，他認為偶爾獲得一些小甜頭已足夠：「揸車泊車有錶位已經覺得好開心，我係一個好易滿足嘅人！」
師兄窮到當八達通
不過幸運背後，原來泰臣亦經歷過失意期，他說：「始終做演員唔能夠寫包單一定穩定，試過有一段時間冇嘢做，因為我哋唔係全職工作，又要Keep住人氣，突然之間冇工作就會囉囉攣。戶口跌到幾位數一定試過，因為演藝學院畢業後做劇團，能夠工作嘅崗位比較少。」他坦言試過一日三餐以麵包充飢：「慳啲慳啲咁食，晏晝都係食麵包，有個師兄當咗八達通，我就買一磅麵包排戲時食，唔係話冇錢買飯盒，係唔夠膽買，慳得就慳。我又未至於要當八達通，但心情一樣好擔心，會諗自己係咪適合呢一行呢？」
幸而他沒有放棄，更以搞笑形象成功入屋，贏得觀眾支持。擅長模仿的他坦言由舞台劇轉演電視劇，當中需要過渡期：「舞台劇係同1,000個觀眾Live，同呼同吸，電視劇就係剪好後再首演，演繹上都好唔同，好多拍劇嘅人都話『你演技可唔可以唔好咁誇？』我哋做舞台劇嗰個舞台太大，手腳移動幅度大啲，但拍劇要收窄喺個電視畫面。依家做咗幾年電視電影，開始拿捏到點樣可以寫實啲。」
泰臣畢業後如願做演員，之後加入劇團，繼而再闖公仔箱。
可以話係過三關行運一條龍。
試過有段時間冇嘢做。
為咗慳錢泰臣買一磅麵包當飯食。
做咗幾年電視，泰臣笑言開始拿捏到點樣可以寫實啲。
泰臣仲爆有個師兄連八達通都要當埋。
泰臣演開舞台劇，形體動作幅度會比較大，畀人嘅感覺係誇張。
泰泰臣（右二）演舞台劇出身，習慣做動作要誇張。
(ON.CC)
