【樣貌身形都Keep得好好】46歲陳霽平:80巴仙係食…

    近年甚少出現幕前嘅陳霽平,08年離開大台回復自由身,之後仲曾經加入港視,雖然港視開台唔成,但因為佢口才了得,英文同普通話都流利,所以冇劇拍都唔緊要,佢就密密接司儀job,工時短,酬勞多,自由度大,陳霽平都唔介意少曝光。

    陳霽平日前同一女性友人現身中環ifc,去親呢個熱點,佢哋多數係喺C!ty’Super濕平時被捕。淡妝嘅陳霽平束馬尾,中褸內着住紅裙,份外搶眼,佢仲披咗大絲巾,熟女打扮。

    當時,陳霽平同女友人喺超巿內掃零食,佢哋好有效率,五分鐘就揀好貨去排隊埋單畀錢,跟住就拎收據去蓋停車場飛。陳霽平全程摩打腳速度,加上佢係着平底鞋,步伐就輕鬆,佢哋好快仲去咗停車場拎車,極速離開。

    《蘋果》今日打畀陳霽平,佢話:「嗰日我去做完摩天輪開幕儀式,跟住過番去ifc度買嘢,我平時買嘢超快,好有目標,因為我要趕過九龍開會,怕會塞車,所以極速走咗。」

    陳霽平話近況都係做吓司儀job,work hard,play hard咁囉。陳霽平樣貌身形都保養得好好,佢話秘密係:「我唔食煙,唔飲酒,80巴仙係食素,我又會揀食有機食物,仲會適當做吓運動,好似瑜伽同行山,當然我瞓都好好,我每晚會瞓足8個鐘。」

    (蘋果日報)

    SHARE