謝霆鋒嘅爸爸謝賢(四哥)已經81歲，但仍寶刀未老，不但保養得好好，仲有個細佢49歲嘅女友Coco。謝賢同CoCo交往已經12年，但最近再傳情變，謝賢日前被雜誌影到同前妻狄波拉一齊去睇衫，狄波拉嘅現任老公江耀城都有同行，仲好識做咁專登行遠啲，等佢哋可以傾吓心事，被猜測謝賢係同前妻傾訴同小女友感情上受到嘅挫折。
爺爺疑似失戀，不過都唔使唔開心，因為兩個孫仔遺傳晒爺爺同阿爸霆鋒嘅帥氣。今日張栢芝喺ig貼咗兩個仔聖誕節準備出街嘅全新造型。
10歲嘅謝振軒(Lucas)同7歲嘅謝振南(Quintus)着住同一款紅黑色皮褸加襯太陽眼鏡，喺聖誕樹下chok住擺甫士，Lucas同阿爸霆鋒一樣咁鍾意插袋，而Quintus另一張相仲索性張裏面件恤衫除埋，剩戴頸鏈配皮褸，真係rock到爆。
栢芝留言﹕「The best Christmas.」
(蘋果日報)
