聖誕節開派對，爸爸媽媽一定要為仔女悉心打扮，今日ig真係好熱鬧，唔少星級家長都將自己嘅仔女靚相放上網，唔知大家覺得邊個BB最得意，可以呃到最多like呢？！
陳冠希嘅太太秦舒培抱住囡囡喺聖誕樹下合照，9個月大嘅Alaia同媽咪好似餅印一樣，着住條shocking pink legging好搶鏡。官恩娜同Jessica C.都懷有第二胎，明年就會添新成員，相信明年聖誕節會更加熱鬧啲。
剛做高齡產婦嘅鄺文珣就同初生B、老公及兩個囝囝一齊合照，還有蘇永康、鄭希怡、黎諾懿、朱薰、張名雅等都為小朋友扮得好靚靚。
而Celine妹妹譚芷昀嘅競敵黑爾（Angelica Hale）雖然冇刻意打扮，但同妹妹嘅燦爛笑容，真係令整個聖誕感覺好溫暖。
不過，最搞笑都係應采兒，佢貼咗張4歲囝囝Jasper再細個少少時候，扮聖誕老人嘅相，見Jasper喊晒口，反而令媽咪應采兒好開心，佢笑話﹕「聖誕快樂！呢張係我其中一張最鍾意嘅相，當Jasper喊嘅時候，我就會笑，依家都係。（煩躁的表情）」
(蘋果日報)
