信仰呢樣嘢，雖然喺現實世界當中到目前為止都冇乜人可以辨認到真偽，但係無所否認，信仰的而且確幫到唔少人渡過難關，幫到唔少人搵到心中嘅依靠。
方力申同鄧麗欣（Stephy）去年爆分手，十年情緣盡斬纜，早前有傳小方儲錢娶舊愛Stephy，當時小方被問到傳言時話收到好多人恭喜，但佢就斬釘截鐵否認舊情復熾；以為兩人分手後就算有聯絡，但都會盡量避見面，點知，喺小方矢口否認復合之後，兩人竟然秘密約埋去馬來西亞，被人斷正。
吳小姐接受電話訪問表示，12月16日喺大馬出席佛教儀式時，於會場見到小方同Stephy雙雙出現：「佢哋一齊嚟，坐低就冇傾偈，同行仲有兩個女人，小方同Stephy表現好避忌，好刻意分開坐，其間都有人行埋嚟同佢哋打招呼。」
從讀者提供相片所見，小方戴有框眼鏡同口罩，由兩位女友人隔開佢同舊愛而坐，Stephy則閉目兼雙手合十誠心唸經，神情肅穆，其間小方企喺身邊同友人傾偈時，就除低咗口罩露笑容。
法會由下午1點至5點舉行，小方同Stephy全程喺度經唸，直至儀式完成後才一齊離開。有傳媒聯絡兩人問係咪復合？Stephy以短訊回覆：「我們再見亦是朋友，而且有共同的信仰，也有一班共同信仰的朋友，所以有時候都會相約一起去法會學佛。」問到Stephy依家有冇拍拖？佢避答感情問題，只表示：「我剛放完假，之後準備下一年的工作，1月《藍天白雲》要上映了，也要做一些宣傳！」小方亦異口同聲否認：「多謝關心，沒有復合。」小方同Stephy一直都係虔誠佛教徒，Stephy更於08年開始食素，當年兩人分手時，Stephy在社交網貼水滴相配佛語抒發心情；而小方就同前藝人林偉亮、衍偉法師份屬好友，信奉佛教嘅小方經常同衍偉法師打籃球弘揚佛法。
Stephy 閉目兼雙手合十誠心唸經，神情肅穆，其間小方企喺身同友人傾偈時，就除低咗口罩露笑容。（讀者提供圖片） 
（Apple Daily）
