女星鍾嘉欣從加拿大飛返香港，到大埔出席倒數活動，吸引大批粉絲逼爆商場，嘉欣獻唱多首歌曲答謝粉絲支持。問到新一年的願望，她說：「年紀大咗就想簡單，希望新一年放低負面、唔開心、失望感都一一丟咗佢，2018要有正面能量。」
講到與老公及囡囡Kelly分開迎接新年，鍾嘉欣表示：「係第一年冇同囡囡過新年，老公係最失望，因為佢放假一個星期陪我哋，會同佢補祝番。（囡囡改咗中文名？）係呀，叫梁愛晨，有三個含義，好多人都封女仔做女神，佢係一位愛神，係愛嘅戰士，同埋係愛晨，即係愛日頭，做一個有朝氣嘅女仔，再食多次字，係愛神（Love God）嘅意思。」
嘉欣又指老公不懂廣東話，因此被委以重任，而自己則有向好友黎諾懿請教，笑封他是「黎師傅」，要多謝對方幫大忙。講到早前與囡囡Kelly母女檔到主題樂園拍特輯，問囡囡會否拍上癮？嘉欣笑言：「佢太細唔識，係一個好開心嘅回憶。（做童星？）唔會，佢未知自己要乜，最緊要有個快樂童年。」
有指嘉欣已約滿TVB，即將離巢自組工作室，她否認說：「依家仲傾緊，仲未有方向，都係傳言，同TVB關係好好，當然想繼續合作，但依家以家庭行先，做咗媽媽有少少懶，所以未好積極咁搵方向，希望快啲決定好話畀大家知。」
(on.cc東網)
