【5年情玩完】媒爆千語BB新對象係…

情己逝…就算當年七次好愛BB,o依家都此情不再,之前已經傳過吳千語因為識咗個有米男,而導致林峯提出分手,呢5年情就咁玩完,林峯同吳千語分別出席活動都暗示大家約兩個月冇見面。其實佢哋出席活動時,明顯見到林峯好頹,成個人瘦晒,反而吳千語笑晒兼春風滿面!答案都令人估到啲……

今日有周刊指,千語戀上嘅對象就係前全國政協施子清長孫施伯雄,報道指原來唔係林峯掟煲先,而係吳千語早喺半年前講想分開,當時中晒「BB降」嘅癡情林峯放低手頭上嘅工作,陪吳千語去歐遊,點知戀火keep唔夠半年,由馬天佑介紹下,吳千語箍實28歲「富三代」施伯雄,正式同林峯斬纜,新歡家族財力比林峯更勁,加上有傳林峯家人唔鍾意千語,所以千語一直未有物業揸手,只係收到林峯送嘅一堆名牌。

據報道稱林峯一直希望有彎轉,冇對外講分訊,但千語懶理林峯,呢幾個月上咗橫店開工,「富三代」施伯雄又去上海做生意,千語同施伯雄就成日喺上海見面,為咗唔想影響自己喺施家嘅印象,千語又未搬出同林峯嘅愛巢,所以見新歡時,千語刻意搵埋馬天佑同場做電燈膽。話晒林峯同千語BB拍拖,必定去名店買嘢、又月租豪宅安置千語家人,反而「富三代」施伯雄嘅家族低調,新歡靠自己創業,平時坐地鐵代步。千語BB睇怕都要陪男友以後要貼地啲喇!

(蘋果日報)