喺《愛回家之開心速遞》裏面飾演大小姐嘅林淑敏，雖然佢嘅性格巴辣兼惡死，只係對住許家傑先見到佢個冧様，不過依然得到網民嘅喜愛，仲有人希望佢可以拎到我最喜愛角色！
雖然林淑敏喺幕前專門做惡女，不過喺現實生活中，反而係一個溫柔嘅老婆，佢喺10年確診患上乳癌，但係佢一直好樂觀同積極接受治療，最後抗癌成功，重新投入工作，之後喺13年同拍拖多年嘅圈外男友陳中原結婚。
今日有周刊報道，結婚已經接近5年嘅林淑敏，同老公依然好恩愛，日前被影到兩人十指緊扣咁返教會，之後又拍拖行街街。
報道仲話林淑敏同老公本身都好鍾意小朋友，但係因為佢仲要keep住食荷爾蒙藥，期間唔可以有BB，於是老公寧願要老婆健康，都想冒呢個風險，所以佢哋o依家好享受目前嘅生活，注重飲食同健康！林淑敏接受周刊訪問亦都話o依家身體已經康復，雖然醫生話如果想生b，可以試吓停藥，但係老公話唔想影響健康，所以唔諗呢個問題，老爺奶奶亦都冇俾壓力，亦都叫佢唔好諗！
(蘋果日報)
