藝人吳彥祖出名高大靚仔，近年喺美劇《荒原》入面做男主角反應非常之好，依家套劇已經拍到第三季，除咗演戲之外，早前由吳彥祖同團隊設計嘅圖書館，仲入圍有「建築界奧斯卡」之稱嘅英國皇家建築師學會獎。以上呢啲大家都好羨慕？不過吳彥祖本人覺得呢啲都唔算最重要，佢喺社交網晒出一張囡囡Raven紮咗一條靚辮仔，款式係照足《魔雪奇緣》Elsa公主造型，吳彥祖好自豪表示係出自佢手筆，仲留言話呢個就係2018年最大嘅勝利，唔少網友睇到都留言話估唔到佢咁好手勢，雖然張相好簡單，但係已經完全睇得出吳彥祖有幾錫囡囡。
佢拍嘅美劇《荒原》大受歡迎。
吳彥祖錫囡囡錫到燶！
之前佢嘅設計仲入圍有「建築界奧斯卡」之稱嘅英國皇家建築師學會獎。
不過幫囡囡紮條靚辮仔先至係最有成功感。
(ON.CC)
