【靠賤男角色掘起】唐文龍曾經窮到住劏房…

48歲嘅唐文龍,因為喺大台劇《溏心風暴3》同陳敏之嘅床戲再度人氣急升,捱足20幾年終於叫做出頭,今次唐文龍喺劇入面,雖然最後為咗胡琳而放棄陳敏之,不過去到故事尾聲,敏之同黃智賢喺埋一齊,唔再係CEO嘅唐文龍,劇情交代佢同胡琳冇再一齊,反而係同第二個女人結婚生仔,兼且仲做埋運輸工人!

今日有周刊報道,唐文龍日前出席完活動,一個人行街嘅時候,有唔少fans走去搵佢影相,雖然o依家睇落好有人氣,不過佢都有落泊嘅時候,報道話佢啱啱入行嗰陣人工唔多,為咗慳錢,過海通常坐船,跟住喺尖沙嘴行路返旺角嘅劏房,連基本生活都有問題,於是乎成日收埋自己,如非必要都唔出街。

報道仲話本身係設計系博士嘅唐文龍,因為鍾意做戲而放棄設計師嘅工作,但係從來都冇後悔,返咗大陸發展嘅唐文龍,喺舊年回流返大台拍《溏心風暴3》,佢接受周刊訪問嘅時候,好坦白話為咗呢個角色考慮咗兩個禮拜,最初擔心觀眾唔接受賤男角色,但係最後覺得演員要接受挑戰,所以答應咗演出!

(蘋果日報)