萬綺雯（蚊蚊）、歐陽震華（Bobby）、梁琤同黃德斌，噚晚喺上海主演舞台劇《紙飛機的天空》，繆非臨（非非）就同老公及囡囡Tiffany拉大隊去捧場，佢哋仲喺後台影相。
蚊蚊同Bobby戲中都扮中學生，要着校服演出，蚊蚊一向保養得宜，佢紮起孖辮着住格仔校服裙扮冒牌學生，拍埋真正學生妹、非非囡囡Tiffany身邊，蚊蚊好似佢大師姐。
蚊蚊係89年亞姐亞軍，而非非係96年亞姐亞軍，兩人當年喺亞視相識，一直友情不變，蚊蚊呢次去上海演出，特別邀請住喺上海嘅非非去欣賞，Tiffany睇得好投入。
非非今日接受《蘋果》訪問，佢話：「蚊蚊同Bobby都扮中學生，蚊蚊着起校服裙好瘦好靚，真係估唔到上海咁多人捧場睇廣東話舞台劇。」非非話囡囡Tiffany好喜歡蚊蚊姨姨，佢話一定要去支持。
(蘋果日報)
