【囝囝當眾搖頭話唔鐘意】星期一至日學足咁多樣嘢

有「蜘蛛女」之稱的鄭麗莎(Lisa)帶同三歲兒子汪晉頤出席攀石場開幕典禮,她表示兒子於半年前開始玩攀石,每星期都會上堂學習。當Lisa問到兒子喜不喜歡攀石,他卻搖頭表示不喜歡,令場面尷尬。

她表示每次兒子玩完攀石,都會獎勵他吃糖果,又認為兒子屬於活躍,所以參加很多興趣班:「星期一玩體操、星期二同我做Gym,星期三打拳、星期四玩攀石、星期五玩跆拳道,而平時去公園踩平行車。(星期日休息?)下星期日開始唱合唱團,搬咗屋之後會學畫畫,依家都有培養佢每日花半個鐘一齊睇圖書。」她又希望在新屋裝設攀石場,好讓全家可以一齊玩。

Lisa直言不怕兒子受傷,表示他就算仆倒流血都唔會喊:「佢好捱得痛,反而爸爸媽媽鬧就會喊,上啲堂都係一個鐘到,當畀佢放電,好過打機。有時放學返屋企瞓完晏覺就話要做運動,所以佢都係鍾意。(佢邊樣運動最叻?)尋日上完第一堂跆拳就話好鍾意,可能氣氛同所有人都同佢玩得好好。」

她認為如果課堂氣氛好,可以更加讓小朋友投入:「佢鍾意好多嘢,但游水得一個人會冇咩安全感。(想囝囝同自己鍾意同一樣運動?)我鍾意成件事同佢一齊享受,唔需要比賽,一齊玩吓練習吓就夠,最緊要親子樂。」

(on.cc東網)