【患鼻咽癌又翻發】袁偉豪:委屈咗媽咪 睇中醫同買標靶藥

藝人袁偉豪在無綫劇《使徒行者2》及《城寨英雄》等都有出色的表現,日前他接受專訪,他自揭辛酸史並透露爸爸患癌,很感激媽媽撐起頭家,現在彈起的他苦盡甘來終可成為家庭經濟支柱!

《城寨英雄》係袁偉豪(右)事業轉捩點。

相信很多觀眾依然對袁偉豪前年在台慶頒獎禮獲「最受歡迎電視男角色」時,喊住多謝媽媽一幕印象深刻,提及此事,他即變得非常感觸:「一直以來都好感激我媽咪,因為我媽咪、我婆婆嗰邊嘅人都一直好錫我,咁當然我嫲嫲都好錫我,但舊年年中佢走咗,雖然係104歲、笑喪,但因為佢走時我唔喺佢身邊,所以覺得好遺憾。」最令他感慨則是母親近四、五年來不辭勞苦照料他患癌的爸爸:「爸爸之前有鼻咽癌,係五、六年前嘅事,醫番好,但之後喺個肺都有事,又翻發,公立醫院、私家醫院都睇勻。定期都要使一筆醫藥費,因為又要睇中醫同買標靶藥,係多咗(經濟)負擔。我因為工作,始終唔係成日行得開,所以盡能力我都會喺物質上(錢)支持。而我唔喺香港,就惟有同媽媽傾電話,跟進住爸爸嘅情況。」

袁偉豪前年頒獎禮上爆喊多謝媽媽

為了報答媽媽一直以來的無私付出,事業開始上軌道的他肩負養家重任,希望可以讓家人放下重擔:「身邊嘅人都好幫助我屋企人,無論經濟上、精神上,媽咪都付出咗好多。早幾年我自己經濟能力都未符合條件,好多嘢都要靠屋企人幫手,依家漸漸出頭,我一定係成為我屋企嘅經濟支柱,好多嘢需要我嘅地方,我都會義不容辭咁幫手,所以係會零舍感觸,都想世界嘅人知我媽咪好偉大、好錫我,亦委屈咗好多,要照顧爸爸真係好辛苦。」

袁偉豪好感激母親嘅默默付出。

 

 

為黃翠如抱不平

而在播畢的無綫劇《使徒行者2》中,袁偉豪經常以「天堂哥」身份晒肌搶觀眾眼球,他直言角色前後段性格大為不同,到臥底身份揭曉等事件發生後更顯內心矛盾,他坦言槍殺周柏豪的幾場崩潰戲最難處理。問到是否視《使》劇為其代表作?他指之前《鐵馬戰車》的「施馬Sir」、《拆局專家》的「石頭」和《城寨英雄》的「牙佬」,都是心愛的角色:「好多謝每一位編劇,好希望每一套都係我代表作,而唔係單單只係一、兩套劇。」

雖然拍檔黃翠如在故事末段憑三段喊戲令人刮目相看,但不少人仍然對她甚為挑剔,袁偉豪即為對方抱不平:「其實佢好用心演戲,佢好想努力繼續學習,但係每一次都提唔起信心,就係因為網民永遠會針對佢,令佢個人好唔夠自信!呢一刻我忍唔住做正義朋友,話畀網民或者網上平台聽一啲正面訊息,唔好夾硬去扭曲一啲嘢,大部分人都覺得翠如有進步,點解仲要有人推佢落個窿度再搵泥埋住佢?好唔公平!」

袁偉豪為翠如抱不平

冇悔入行

袁偉豪在新劇《棟仁的時光》和《三個女人一個「因」》擔任男一,開始在芸芸小生中佔穩陣腳,問到是否以視帝為目標?他表示:「反而我冇特別去諗,我覺得當然呢個可以視為目標,但如果每一次都當係交易咁做,會畀自己更大壓力。如果係樂在其中,就可以畀觀眾睇到袁偉豪更多嘅嘢。之後我希望身體力行多啲,用自己嘅力量幫助有需要嘅人,做吓慈善工作。」

十多歲已入行,問袁偉豪有否一刻後悔?他答:「入行廿年嚟都冇後悔過,我覺得人生裏面冇乜嘢令我後悔過,因為好多嘢冥冥中有個主宰,廿年嚟嘅學習同經歷先至有今時今日嘅我。」至於廿年來誰影響他最深?他直指從恩師鍾鎮濤身上學習很多東西:「佢好叻,人生經驗好豐富,亦都係一家之主,養住好多人。佢有好多經歷,正正就係我幫佢做嘢嘅時候,佢嗰幾年都係喺佢個經歷當中奮鬥。」

 

袁偉豪肩負養家重任。

袁偉豪搏命搵銀搵醫藥費救爸爸。

袁偉豪指自己冇後悔入行。

(ON.CC)