【兩個囝囝超期待】陳倩揚宣佈佗第三胎!

恭喜!恭喜!08年港姐亞軍陳倩揚,喺2010年同拍拖8年嘅陳浩然結婚,之後生咗羲廷同羲穎兩個仔,今日倩揚宣佈三度懷孕,預產期係今年7月,一家人好開心迎接第5位家庭成員。

講到今次有咗第3胎,倩揚話:「我同老公一直都都鍾意大家庭,所以都有計劃可以生多一個小朋友,我哋都好開心踏入新一年,可以同大家分享呢個好消息,我好感恩同珍惜能再做媽媽嘅緣份,感謝身邊每一位各位親友、粉絲、網友嘅祝福。」

唔知兩個囝囝知道榮升做哥哥又有乜反應呢?倩揚話:「兩個哥哥已經非常期待弟弟或妹妹嘅來臨,佢哋仲開始將自己心愛嘅玩具、衣物分給BB,真係好可愛。」至於工作方面,倩揚就話:「我唔會放產假,會繼續喺幕前做嘢,直到七月,我都已經嚟到第三胎,喺呢方面有豐富經驗,反而有唔少客戶知道我有BB,唔單止冇顧慮或猶豫,開工嗰陣仲會好貼心提醒我,叫我唔好着太高嘅高踭鞋,又叫我記得要食飽先做嘢!」

(蘋果日報)