【同Selina離婚之後】傳張承中撻著…

    張承中與S.H.E.成員Selina(任家萱)一起走過順逆,卻沒能一起走到白頭。兩人於2016年3月4日晚宣佈離婚,結束約5年多婚姻。張承中更表示,自己應該就離婚負最大的責任。

    雖然兩人強調不涉及小三、不育等問題,但當時台灣嫩模卓苡瑄就被傳係第三者。回復單身嘅阿中,曾與女主播洪藜恩傳緋聞,女人緣極佳,近日就被影到相約一女子睇戲,密會3小時,而對方就係狄以達(前名:狄易達)前度、34歲嘅台灣女星吳亞馨!


    據指張承中當晚被影到獨自現身戲院,之後就同坐埋一邊嘅長髮女子會合,原來就係吳亞馨,而同行仲有一個戴上口罩嘅女友人,反而阿中及吳亞馨就冇「喬裝」,不過女方似乎發現有啲唔對路,於是叫阿中同女友人先入場,自己就匿喺樓梯底唔肯蒲頭。直到阿中同女友人叫佢,吳亞馨先現身,未久又有一名男子同佢哋會合,由二人約會變四個人Gathering!

    到散場時,警覺性都非常高嘅吳亞馨及張承中前後腳離開,原本打算坐女方車嘅阿中,左望右望後最後決定改搭的士閃人!

    報道指兩人見面期間一直「高度戒備」,左右張望有冇傳媒跟蹤,女方更一度匿埋樓梯底不敢現身。

    吳亞馨2015年曾與細5歲嘅狄以達拍拖,兩人愛得癡纏不時港台兩邊走!同年10月吳亞馨捲賣淫風波,男方即時發聲護花,不過呢段姊弟戀大概只維持咗一年就結束!

    其實前年阿中被拍到同主播洪藜恩街頭舌戰時,Selina已被問回應,當時佢好大方咁話祝福阿中,又稱對於阿中,佢一早就放低咗,又表示對愛情仍沒放棄,只係唔會強求。

    今早吳亞馨接受台灣《蘋果》訪問,談及與張承中關係,吳亞馨稱:「他是朋友的朋友,一起看電影,看完我就回家了。」既然冇嘢,咁點解要匿埋?吳亞馨笑稱:「看到鏡頭下意識會躲。」又話大家只係普通朋友,約埋睇戲之嘛。

    (蘋果日報/on.cc東網)

    SHARE