陳凱琳(Grace)同森美今日到銅鑼灣出席運動品牌活動，Grace即場示範最新春裝之餘，佢仲即席以保鮮花做花火瓶，以白、藍同紅色嘅花喻意事業、家庭同愛情。森美就自嘲結婚多年，愛情已變粉紅色，Grace就冧爆咁話佢嘅愛情仲係紅色。
Grace接受訪問時就話，剛同男友鄭嘉穎去咗加拿大旅行，佢哋去到當地就不停試新餐廳：「食多咗呀，飽滿咗，佢(嘉穎)都係。」Grace透露男友去咗上海工作，農曆新年先返香港，佢話：「我哋會互相去對方屋企拜年。」
問到鄭媽媽係咪視佢為新抱仔？Grace就賣口乖大讚未來奶奶：「成日煲湯畀我飲，又會叫我保重，唔好再瘦落去。」至於何時改口叫對方做媽咪？她甜笑話：「未有咁快，佢冇催，見我哋咁好都好安樂啦。」
(蘋果日報)
