56歲嘅歐瑞偉前年喺《城寨英雄》飾演絕世高手，估咗好耐仲做埋大Boss，嗰陣有一幕影住佢爆衫露出一身完美肌肉，結果惹大家嘅驚嘆，個個都讚呢個入行超過30年、拍過攝超過100套劇集嘅歐瑞偉另眼相看，大家都讚佢keep得好，寶刀未老！連帶歐瑞偉喺《愛．回家》飾演賤精律師KC都有話題，讚佢夠晒抵死。
歐瑞偉最多人講嘅劇，一定係《愛．回家》系列。(電視截圖)
同助手Terry，即係李偉健啦，HeHe到出晒面。(電視截圖)
一班演員跳手勢舞，歐瑞偉咀完左邊咀右邊。（facebook截圖）
舊年歐瑞偉喺《同盟》再演好打得嘅角色，飾演忠心護主保鑣易先生，佢同令小姐(鮑起靜)關係微妙，最後為咗保護令小姐慘死一幕，搞到大家個心碎晒，而呢套劇亦令佢有份提名今年大台頒獎禮嘅男配角獎，同喺《愛．回家之開心速遞》飾演大小姐嘅林淑敏一樣，都係大熱門人選！
介紹番，歐瑞偉今次係憑《同盟》嘅易先生提名男配角。（劇照）
噚日歐瑞偉接受傳媒訪問，講到今次得獎信心，佢話：「冇，真係冇信心，不過知道咁多人鍾意我做嘅角色，當然覺得開心，亦都好多謝大家支持！」
陳山聰都係憑《同盟》提名，同歐瑞偉互笠高帽。（劇照）
之後佢仲話睇好陳山聰可以攞獎。雖然山聰舊年喺「TVB馬來西亞星光薈萃頒獎典禮2017」中獲得男配角，但係佢接受訪問，講到有冇信心再下一城嘅時候，佢好坦白話：「邊係我呀，今年競爭好激烈，個個對手都好勁，所以我喺大馬拎到已經好滿足，其實真心今年已經超出我預期，已經大豐收，所以平常心面對！」山聰亦話睇好歐瑞偉，一定支持《同盟》！
(蘋果日報)
