娛圈生活從來都係五光十色，但係同時亦都充滿明爭暗鬥。自從黎姿同商人馬廷強結婚之後，火速放棄咗燈紅酒綠嘅娛圈生活，不過樣貌標緻嘅黎姿，喺淡出呢個名利圈前，除咗有唔少緋聞，亦不時惹上是非。
唔知大家仲記唔記得04年《萬千星輝頒獎典禮》，《金枝慾孽》四主角佘詩曼、張可頤、鄧萃雯同黎姿一齊爭視后，原本呢個獎係飾演如妃嘅鄧萃雯嘅囊中之物，連英國網上博彩公司以一賠四嘅盤口列如妃為大熱門，點知最後爆冷門，由黎姿飾演嘅「玉瑩小主」搶走，令網民鼓譟，仲盛傳話黎姿當年因為簽無綫做經理人而贏獎，搞到佢都覺得好委屈。
而另一方面，原來呢件事，一直都放喺雯女個心入面，直到13年雯女去咗溫哥華擔任一個教會佈道會嘅演講嘉賓，喺演講期間，雯女將拍電視劇多年來嘅鬱結都講晒出來，04年視后大熱倒灶，俾死敵黎姿攞咗視后，好多人都戥雯女唔抵，原來雯女自己都放唔低，佢話:「我成日都覺得我梗係有實力o架!有晒人生經驗啦，我以前唔忿氣，咁多後輩攞到獎未到我。」
直到09年，雯女先憑《巾幗梟雄》四奶奶一角拎返視后，不過歲月飛逝，當年咁多是是非非，到咗今時今日睇返，原來所謂嘅視后已經唔再重要，兩位主角亦都已經過緊各自各嘅生活，視后？年年都有啦。
（蘋果日報）
