【原來媒人係佢!】原來李潔瑩第一次見黎諾懿印象麻麻

「我係12號李潔瑩。」

冇錯!李潔瑩(Nicole)除咗係黎諾懿老婆,小春雞個阿媽,佢07年仲參選過港姐,當年冠軍係張嘉兒,亞軍係王君馨,季軍係周美欣。問到當年點解會參選?Nicole哈哈笑話:「當年參選係媽咪同auntie幫我報名,我嗰時喺澳洲讀書,媽咪打電話俾我,話同我報咗名參加港姐,我都嚇咗一跳。」

由參選港姐到o依家成為人妻,冇入娛樂圈發展嘅Nicole,如果唔係同黎諾懿拍拖、結婚,本來已經同娛樂圈扯唔上關係,佢就笑言,當年如果入咗行,反而可能唔會識到諾懿,至於佢同諾懿相識嘅經過,Nicole話「媒人」原來係周美欣:「佢嗰時同諾懿喺《讀心神探》合作,之後佢成日同我講呢個人好funny,話得閒要介紹我識,講咗好多次我都去唔到,後來有次喺周美欣屋企見到佢,但嗰次印象麻麻。」

印象唔好都有機會發展嘅?Nicole又立即替諾懿講好話:「其實又唔係唔好嘅,佢哋嗰次大班朋友喺度,個個都飲醉晒,個個都好嘈,好似唔係一個正常人咁。(點開始?)老老土土咁啦,之後佢都有約我出嚟,初初成班人,約約下就得我哋兩個咁囉!」

原來,Nicole初初同諾懿拍拖,低調到連父母都冇講,佢話:「諗住去下街先,了解下先,點知好快俾人影咗,好快就浮咗面,咁第一時間同父母解釋先,因為嗰時啲雜誌通常寫負面嘢,媽咪都好緊張問點解。」

父母冇叫唔好搵圈中人?Nicole就話冇:「其實都係職業啫,只不過呢個職業俾人容易知道多啲私生活,邊行都有好同唔好,要識咗,了解咗先!」Nicole笑指為平息父母嘅擔心,好快就安排佢哋同諾懿見面,兩老見到佢就好鍾意喇!

對於近幾年關於佢同老公黎諾懿嘅新聞,都圍繞著女尊男卑,佢豁達回應:「真係冇理,佢(諾懿)初初可能有啲唔開心,但後來覺得大家想點寫就寫,而我就覺得冇乜嘢,佢(諾懿)好勤力付出,同埋我同家人知係點就OK,佢養得我起有餘!」Nicole又撐老公謂:「有冇錢係bonus,咁佢(諾懿)o依家都唔差吖!

(蘋果日報)