【網民圍剿視后】蔡思貝拎獎唔拍掌 唐詩詠承認黑面

有獎攞好啲,定係做輸家好啲?今年無綫頒獎禮嘅結果,似乎係後者好啲。

頒獎禮係招是非嘅,係疑於賽前已續約嘅出爐視后唐詩詠。講番先,噚日有報道話,身穿性感開胸裝嘅佢,經過一晚又驚又喜,仲要接受密集式訪問,身心俱疲,結果當晚已經見唔舒服,但都頂硬上,翌日仲病埋,被迫缺席朋友為其舉行嘅祝捷會。原來唐詩詠嘅不適,唔單止係攝親,仲包括M痛。連日嚟不斷有網民留言鬧佢,話佢唔應該得視后;亦有人話唐詩詠只係最佳女配角,絕對唔係最佳女主角。其實宣佈賽果當刻,已有不少網民留言為宣萱田蕊妮抱不平。

睇番片,頒我最喜愛女角色前,唐詩詠有笑。

反而唔多笑嗰個,係胡定欣。同埋留意番,唐詩詠一直以手掩腹,好似真係M痛呾咁。

宣佈一刻…唐詩詠有笑有拍掌。但最開心嘅係李佳芯。

王浩信最戥蔡思貝開心呀!

估唔到未好番晒唐詩詠,又會回應。有網民問:「恭喜你最佳女配角!點解蔡思貝領奬你要黑面嘅?你係咪雙面人啊?」唐詩詠覆佢:「因為女人之苦,每月一次,會有間竭性嘅痛楚,亦害怕有意外發生。令你誤會不好意思。」但亦有人反駁:「關事咩,全晚得嗰刻黑面?有無咁啱?好好戲喎你,唔怪得攞最佳女主角。」繼續咬住唔放。唐詩詠嘅fans見偶像被圍剿,當然好嬲,紛紛留言反擊。其中有人就寫道:「其實我都唔明,點解之前Yahoo頒獎典禮王浩信同唐詩詠一齊攞視帝視后冇人鬧,冇人話唔配攞獎,但係今次TVB攞視后,你哋啲人就咁多聲氣?一個人連續得到三個唔同嘅頒獎典禮肯定得到嘅視后難道不是實至名歸嗎?所以唐詩詠你要加油,你得到視后絕不是浪得虛名,我哋會永遠支持你撐你!」

唐詩詠咁樣樣算唔算黑面?
雙手真係蓋住個肚喎!好似好痛咁~

(Apple Daily)