33歲吳浩康最近歌唱事業有啲起色，點知感情觸礁，本來同拍拖一年嘅前酒樓太子女李昭南(Michelle)感情幾好，之前佢開個唱，女友都現身支持，不過今日有周刊爆二人今個月已分手，吳浩康飽受失戀之痛，上周喺中環當街爆喊，話晒男兒有淚不輕彈，睇嚟佢今次都幾傷，呢排一個人去酒吧飲悶酒。
報道又指吳浩康同Michelle成日嘈交，分手後吳浩康又唔捨得女友，雖然之前有多次衰偷食，不過近年吳浩康都想穩定落嚟，認定Michelle做結婚對象，而且已帶女友見家長，吳浩康接受周刊訪問時，佢都默認分手，未知係唔係仲想箍煲，只係話佢哋需要空間，又稱佢哋之間冇第三者，反而Michelle好有決心斬纜，直認分手之外，仲好感激吳浩康呢年幾嘅愛護，目前二人仍有聯絡，唔肯講分手原因。
Michelle選過全美華埠小姐，獲Second Princess，於美國讀書，曾經喺華盛頓政府總部實習，做過新聞節目《VA News This Week》主播，後嚟回流返香港搵工。
(蘋果日報)
