如果要用一組詞語去形容剛過29歲生日嘅黃心穎嘅現況，應該係「雙贏」。點解咁講？先講愛情，心穎BB同馬國明戀情已經係公開晒，之前仲一齊歐遊，發展更進一步；事業方面，心穎唔止更進一步，直情係三級跳。事情愛情雙贏，真係win晒！
其實心穎喺2015年拍《東坡家事》仍然係第二女主角，之後都係做第二三女主角，未見「晉級」，就連之前拍好咗嘅《堅離地愛堅離地》，心穎都係第三女主角，俾龔嘉欣同劉佩玥騎住。但最近喺大台賀年劇《丫鬟大聯盟》，心穎已經一躍而上成為女主角，搭洪永城做「鬥氣冤家」。
本報收到風，其實套劇原先嘅女主角，其實係依家變成「阿二」嘅湯洛雯。《丫鬟大聯盟》監製係歐耀興，之前係編導，前作包括《張保仔》、《盛世仁傑》、《Only You 只有您》、《真相》等，曾轉投港視，2015年返無綫，轉任監製，作品例如……《燦爛的外母》咁啦……今次亦係佢同「靚湯」湯洛雯第四次合作。喺《燦爛的外母》裡面，仲安排湯洛雯同薛家燕飾演兩母女，角色度身訂造，算是女主角之一，擺明係益愛將。
但依家，黃心穎個勢明顯強咗，之前加入「無記女團」喺《勁歌》總選表演，就連《愛回家》主題曲都有佢份，個勢明顯係想力捧佢；反之靚湯湯洛雯，似乎冇呢個氣場，難怪阿一變阿二…今次套《丫鬟大聯盟》顧名思義就係講啲丫鬟點樣聯合起嚟捍衛權益同尊嚴，男主角係洪永城，第二男主角係謝東閔。丫鬟大聯盟大家姐「月盈」一角，據知原定就係俾湯洛雯做，阿二「月皎」就係外表「妹仔格」嘅黃心穎做。
套劇日前試造型，就喺造型之前，正式易角，心穎變女主角，亦係首次擔正。佢受訪時話做女主角冇壓力，仲話：「今次係套喜劇，又有湯洛雯分擔，開開心心拍就得。」洪永城喺劇中飾演風流倜儻嘅少爺仔，同黃心穎發展地下情，佢接受傳媒訪問時，表示一開始接拍此劇時只知有黃心穎同湯洛雯，但邊個係主邊個係次，佢都朦查查唔清楚。「由一變二」嘅湯洛雯回覆傳媒時就話：「我一開始接呢套劇嘅時候，監製已經係同我傾我o依家個角色㗎喇，而且我個角色亦好適合我演，所以我諗冇咁嘅事啦！」
至於心穎回覆傳媒時話：「呢個唔知喎，到我收到消息，我開工已經係咁樣㗎喇。」
難怪，心穎前日喺迪士尼拍外景時，心情勁靚，《蘋果》讀者BoBo噚日透過「爆相爆料」目擊過程，BoBo前日下午4點左右，喺迪士尼見到心穎，仲話當時佢打扮得好casual，着住一件牛仔褸同黑色褲，同一位打扮成小公主嘅妹妹一齊睇巡遊表演。當時應該係拍嘅嘢，因為現場有攝影機不停影住心穎。
鏡頭以外，發現心穎原來都好有母愛，見小妹妹咁得意，就忍唔住摸咗妹妹嘅臉珠一下，又同妹妹一齊拍手掌，好有愛心同耐性。由妹仔變阿大喎，心情梗係靚啦！
(蘋果日報)
