【講到同阿Sa一齊結婚…】阿嬌:嚟飲做兩份人情

    準人妻阿嬌噚晚出席小紅姐生日party,講起未來老公賴弘國即甜絲絲,講明想介紹未來老公俾大家認識,不過阿嬌先護住未婚夫,阿嬌衝口而出:「佢唔係好鍾意話佢係『醫界王陽明』,佢係佢,王陽明係王陽明,唔係王陽明唔靚仔,我覺得我未婚夫靚仔啲,唔好再用呢個名嚟形容佢。」

    講到好姊妹阿Sa同百億闊少石恆聰(Anthony)感情穩定,阿嬌想唔想同蜜運中嘅阿Sa合體「Twins孖妹出嫁」?阿嬌笑言:「唔可以代佢答,我哋感情嘢唔會傾,唔會八卦問,要講自然會講。」阿嬌心郁郁搞合體婚禮:「大家嚟飲,做兩份人情,我哋賺晒啲錢,係幾抵,拉個藍布景,key落去。」

    阿嬌講明婚後想生B,不過幾時生小朋友,阿嬌覺得生幾個要問個天,對於呢個100分嘅未婚夫有冇咩缺點?阿嬌原來唔鍾意鬍鬚男:「我唔鍾意人唔剃鬚,不過佢做嘢剃鬚,啲人同佢講賴醫師你又靚仔咗,佢喺我面前會剃。佢缺點唔識生仔,佢唔會大肚,最好佢幫我生埋啦,男人都可以生BB,懶到我咁都有人要,真係幾咁難得。」已訂婚嘅阿嬌還霸氣咁話:「我返去就叫佢醒定啲。」

    阿嬌冧爆未婚夫,噚日農曆生日,問到賴弘國喺咪等佢回家再慶祝,阿嬌話:「冇喎,我問佢點解唔送生日禮物,佢話送咗戒指,但生日還生日嘛。」求婚後嘅首個情人節,阿嬌當日要開工,元宵則去老闆楊受成屋企拜年,佢希望趁旺做莊開局發大財。問到佢打算點搞婚禮,阿嬌似乎冇乜頭緒:「未plan,唔係今日求婚,聽日結。」

    小紅姐講笑:「今月求婚,下個月結,再下個月生埋仔。」阿嬌有啲無奈:「三日搞掂,生埋三胞胎㖭呀。」阿嬌強調婚禮唔鍾意玩浪漫,更自爆最憎食法國餐:「食乜鬼法國餐,慢到死。」阿嬌五月開演唱會,所以暫時未有結婚計劃,佢自認懶爆,唔排除交由未婚夫安排:「到時我出席咪得。」

    (蘋果日報)

    SHARE