剛生完四個月左右的楊洛婷（Rabeea），並沒有因湊女而停工，佢昨日現身鐘錶活動，擔任主持，Rabeea接受訪問表示，雖然佢係新手媽媽，但湊B無難度：「我哋都係自己湊，無請工人，如果我要工作，老公阿Tim就會睇住佢，如果佢返工就我自己湊，如果兩個都要做嘢先交俾奶奶湊，其實依家囡囡出世4個月，都湊得好輕鬆。」
楊洛婷今日為鐘錶活動擔任司儀，她說產後肥了30磅，現在減咗唔少磅。
好多新手父母都因為照顧新生BB而焦頭爛額，但Rabeea就湊得得心應手，除咗扮靚靚出席活動，佢仲可以一邊湊小朋友一邊抽時間做運動：「等BB瞓咗之後就會抽時間做運動，天氣好嘅時候就帶佢出去散吓步，所以其實湊B真係無想像中咁困身。」
楊洛婷同老公阿TIM無請工人自己湊女，湊得好輕鬆。（IG圖片)
（IG圖片)
（IG圖片)
Rabeea因為懷孕而重咗30-40磅，生完之後都仲有30磅，佢除咗做運動，都有其他輔助收身方法：「我有去美容院做機，1個星期3次，效果真係好好，全身瘦咗好多吋，亦減咗好多磅，另外我仲有做古法紮肚，呢個唔係只係為咗減肥，亦係有保健作用，因為生完BB之後，啲內臟移位，靠紮肚嚟令到腹直肌復元。」Rabeea所講嘅古法紮肚，有唔少女明星生完之後都有做，包括徐子淇、張名雅、陳爽等。Rabeea強調佢唔係一個追求骨感嘅女仔，所以會選擇健康嘅方式減肥。
唔少女星產後都有做古法紮肚，張名雅係其中一個。（IG圖片)
楊洛婷透露一家三口會在農曆新年首次去旅行，計劃到新加坡及日本：「第一次三個人去，囡囡先四個月大，所以都要帶好多BB嘢去，因為我仲餵緊人奶。」她亦自爆早前一家三口首次拍尿片廣告，由囡囡自己賺尿片錢，然後更說等身體恢復及與朋友去完古巴旅行後，計劃再與老公造人。
(HK01 / ON.CC)
