【仲一齊揀BB車⋯】「一家三口」出巡超溫馨

無綫藝人張秀文與前經理人Victor的緋聞傳了多時,惟兩人一直未有公開認愛,近月秀文飼養柴犬「太郎」,Victor頻頻幫手照顧令感情升溫,他們的Instagram分享大量與太郎的合照,又分別自稱「媽媽」與「爸爸」洩蜜如同一家三口,部分照片更有相同背景,即惹來同居疑雲!

日前,張秀文與Victor帶同太郎到灣仔會展寵物嘉年華,「一家三口」恩愛出巡,先帶太郎買狗仔食品及狗骨,又細心挑選寵物BB車並讓太郎試坐,之後二人再到狗場放狗,期間秀文被不少「狗友」認出,加上太郎超級可愛吸引不少「狗友」上前合照,張秀文及Victor亦大方影相,兩人當正太郎親生仔,期間Victor做足「好爸爸」本分,見太郎行到攰就會主動抱起牠,「好媽媽」秀文則幫手調校孭帶,兩人更忍不住齊齊錫啖太郎,畫面溫馨爆燈!

秀文接受東網訪問,問到跟Victor是否因愛犬而感情大增?她直認因多了傾有關太郎的事,溝通得愈來愈好:「舊年我開始養太郎,依家佢九個月大,但因為我成日離開香港工作,隻狗會交畀Victor,太郎好黐我,但都好跟Victor。(你哋成日喺同一背景影相,係咪同居?)係鄰居,有時我湊番隻狗,就喺佢度影埋相。」

她笑言最近Victor幫太郎接了廣告,如同經理人般才自稱「爸爸」,又指二人並非首次齊齊帶狗出街:「今次帶佢去寵物展係畀佢見吓世面,因為佢怕狗多過怕人。」

(on.cc東網)