「處女黨」嘅最後一個成員苟芸慧（Christine）今日喺ig正式宣佈結婚，苟姑娘話雖然大家都已經認定咗對方，不過喺呢一刻來臨嘅時候，呢一份喜悅真係好難形容，成功抱得美人歸嘅陸漢洋，就話能夠與Christine一起共度下半生，佢知道自己已經是「宇宙最幸福的男人」。
身為好姊妹嘅李亞男，對於苟姑娘即將加入人妻行列，佢話：「我好為Christine開心！我哋幾個姊妹等佢呢日都等咗好耐，我都好surprise姐夫會突然同佢求婚。希望Christine同佢個白馬王子會幸福快樂，早啲生返個可愛的BB！李亞男仲話：「從今以後，大家口中稱的處女黨全解散，索爆人妻團終於人齊！」
另一個好姊妹鍾嘉欣就話：「我已經知道呢件事，真係好戥Christine開心，我好期待呢一日，祝福佢哋可以好開心又甜蜜嘅婚禮，不過其他嘢就等Christine自己公佈。」
王君馨亦話：「開心佢哋終於宣佈咗，之前大家比較心急，因為佢哋係amazing Esther 後一位成員結婚。o依家終拉埋天窗，好戥佢哋好開心，希望佢哋恩恩愛愛，白頭到老，希望年生貴子，哈哈，因為Christine好鍾意小朋友，唔知佢哋緊會唔會停一停賽車嘅嘢，去做呢個造人大計？anyway 祝福佢哋，要做姊妹叫到一定做，睇佢幾時嗌啫！」
岑麗香亦接受訪問表示：「祝福佢哋幸福快樂、一生一世、白頭到老，聽到呢個消息非常開心，好期待我哋咁多個姊妹可以一齊同佢plan婚禮。好開心我哋五個女仔（李亞男、鍾嘉欣、岑麗香、王君馨及苟芸慧）都去到做人妻呢個階段，睇到相都覺得佢哋好sweet，好戥佢哋開心。」
(蘋果日報 / on.cc東網)
