【咁要留意下】玲玲姐:鄭嘉穎同陳凱琳分分鐘註咗冊

    鄭少秋、汪明荃(阿姐)同玄學家麥玲玲今日喺沙田馬場出席「農曆新年賽馬日」,秋官同阿姐唱歌助興,佢哋表示要沾下旺氣,問佢哋會唔會賭馬?秋官表示會一齊夾錢買。有冇橫財運?阿姐話:「喺年初一嘅節目,我抽到隻金犬。」秋官即刻話:「屬豬今年好運,但係我『豬兜』咗咁耐仲未到我。」阿姐透露新年之後唔會去旅行,因為有好多公職在身,秋官就話:「我真係寫個服字俾佢,日日咁多節目,又有公職,仲攞埋博士。」阿姐笑住話:「唔係好多,3個啫!」秋官即刻表示:「幾時輪到我呀?」今年嘅願望係想攞博士名銜?秋官表示:「唔敢,呢啲唔係自己話攞就有啦。」阿姐即示意會提名秋官。講到欣宜4月開個唱,秋官表示會去睇,但佢自嘲係old fashion,所以唔會上台。

    講到今年運勢,玲玲師傅指立春後,娛樂圈會持續有喜事,仲會係喜上加喜,尤其會旺單身嘅人,容易結婚。對於圈中4對情侶,馬國明同黃心穎、楊明同莊思明、鄭嘉穎同陳凱琳、蕭正楠同黃翠如會唔會有喜訊?玲玲師傅話:「我有叫莊思明今年結婚,結婚之後,楊明好啲,會紅啲、攞獎,佢旺夫;馬國明就2018年籌備,2019年結得;鄭嘉穎同陳凱琳似乎好低調,分分鐘註咗冊,佢哋係幾穩定嘅一對;蕭正楠同黃翠如當係(結婚),今年可以向佢哋攞利是,下一步就係有喜,佢哋有喜先至會公佈。」玲玲師傅透露今年比較旺草花頭、有木字嘅藝人,例如李、林、楊,同埋旺高瘦形嘅人。我點算?唔怕,我有C君陪。」講到玲玲師傅嘅豪宅曝光,問佢今年仲會唔會入市?佢話:「計劃今年喺中環買寫字樓,大約預幾千萬。」

    提到秋官喺農曆新年表演,對今年股市有冇影響?玲玲師傅笑住話:「唔好咁樣啦,唔關佢事架,秋官遇到火土運,就會大紅大紫,但係香港唔啱行火土運,所以秋官嘅命格同香港嘅步伐掉轉咗。」此外,陳玉蓮嘅團體馬「快樂實在」,今日有份跑第3場,佢喺賽前表示對愛駒有信心,落重注?佢笑住話:「小賭怡情,小錢贏大錢。」問佢會唔會再買馬?陳玉蓮話:「朋友已經講緊,亦有其他團體叫我一齊。」張振朗、陳芷尤、謝東閔、趙慧珊(Super Girls成員)都現身馬場,講到張振朗同緋聞女友陳芷尤一齊,張振朗笑住話:「呀⋯⋯一齊嚟開心下!」之後大方合照。

    (蘋果日報)

    SHARE